O Concello anima á participación nos concursos de Compadres, Comadres e o Desfile de Entroido, que repartirán máis premios que nunca
O Concello de Monforte aprobou o pasado luns, 10 de febreiro as bases para o Entroido 2025. A publicación das bases e dos formularios de inscrición na páxina web municipal permitirá que os interesados participen nos tradicionais concursos de Xoves de Compadres, Xoves de Comadres e o Desfile do Martes de Entroido.
Neste ano, o Concello decidiu incrementar a partida destinada aos premios en 4.000 euros, alcanzando un total de 25.000 euros, o que representa un aumento do 19% respecto ao ano anterior e do 39% en relación co 2023. O alcalde, José Tomé Roca, destacou que este incremento busca fomentar a participación e contribuír ao éxito do Entroido, subliñando que se trata da maior partida económica asignada a estes concursos durante o seu mandato. O aumento afectará a todas as categorías, especialmente en carrozas e comparsas.
Os primeiros eventos do calendario serán o Xoves de Compadres, o 20 de febreiro, seguido do Xoves de Comadres, o 27 de febreiro. O Martes de Entroido, o 4 de marzo, terá lugar o tradicional Desfile de Comparsas e Disfraces, mentres que o Enterro da Sardiña pechará as festividades o 5 de marzo.
Para os concursos de Xoves de Compadres e Xoves de Comadres, establecéronse tres modalidades: centros de ensino, parroquias, barrios e rúas do Concello, e unha categoría individual, que se celebrará na Praza de España. A avaliación terá en conta a orixinalidade, a montaxe, o interese etnográfico e a crítica social. A puntuación asignada aos diferentes aspectos será variable, entre o 10% e o 25% do total.
Os premios en cada categoría estarán dotados con até 2.000 euros. Na categoría individual, o primeiro premio será de 100 euros, o segundo de 75 euros e un accésit de 50 euros. Nos colectivos, os premios oscilarán entre os 150 e os 75 euros, ademais de outorgar premios especiais á etnografía e á crítica social, ambos de 150 euros.
O prazo de inscrición para o Xoves de Compadres rematará o 19 de febreiro ás 14:00 horas, e para o Xoves de Comadres o 27 de febreiro á mesma hora. As inscricións poderán realizarse tanto no Rexistro Xeral do Concello como a través da Sede Electrónica.
O Martes de Entroido, 4 de marzo, terá lugar o Desfile de Comparsas e Disfraces, con premios diferenciados para participantes de Monforte e de fóra do municipio. O Concello destinará 17.850 euros para os grupos locais e 3.150 euros para os forasteiros, un incremento do 19% e 36% respectivamente con respecto ao ano anterior. As comparsas que teñan máis de 90 compoñentes poderán optar a un primeiro premio de 1.500 euros, mentres que as de fóra de Monforte optarán a premios de até 600 euros. Tamén se entregarán premios especiais de 300 euros ás mellores comparsas tradicionais, mellor posta en escena, mellor crítica de actualidade, mellor humor e mellor música en vivo.
O desfile comezará ás 17:00 horas na Praza da Estación, percorrendo as rúas Calvo Sotelo, Roberto Baamonde e Cardeal Rodrigo de Castro, e rematará na Praza da Compañía. A valoración das comparsas terá lugar desde as 16:00 horas, e os disfraces individuais deberán presentarse ás 16:30 horas na Praza da Estación.
O alcalde, José Tomé, animou á participación tanto da veciñanza de Monforte como de colectivos doutros concellos, resaltando o esforzo do goberno local para consolidar o Entroido monfortino como unha das festas máis relevantes da Ribeira Sacra.•
Cargando ...
