A plataforma Queremos Galego anunciou a convocatoria dunha manifestación que terá lugar o 23 de febreiro en Santiago de Compostela, co lema Lingua vital xa!. A mobilización sairá ás 12 horas da Alameda e rematará na Praza do Obradoiro, onde se celebrará unha actuación musical. A cidadanía está chamada a unirse a esta protesta no día de Rosalía, para transformar a emerxencia lingüística en forza reparadora e garantir a supervivencia do galego.
Na presentación, realizada esta mañá, participaron representantes de máis de 20 entidades culturais, sociais e políticas. A coordinadora de Queremos Galego, Celia Armas, destacou que a lingua é fundamental para a identidade galega e chamou a unha mobilización cidadá que impulsione un cambio real. A plataforma denuncia que a recente proposta de modificación do PXNLG por parte da Xunta só busca rebaixar as medidas de protección do galego, facendo imposible avanzar na súa normalización.•
Cargando ...
