Foto GPVDL.
O Concello de Quiroga incorporou recentemente nova maquinaria para a limpeza e roza de camiños rurais e arredores dos núcleos. Grazas á colaboración da Deputación de Lugo, a través da área do Medio Rural e Mar, e Xuventude de Vicepresidencia, que realizou un investimento de 7.000 euros, a localidade recibiu catro rozadoiras manuais e unha motoserra. Todo este material será utilizado polo persoal encargado de manter as infraestruturas municipais e das rutas de sendeirismo que percorren o concello.
O acto de entrega tivo lugar na vila, cunha participación destacada da deputada provincial Iria Castro e do alcalde José Luis Rivera, xunto a outros membros do goberno local. A adquisición destas ferramentas permitirá mellorar o acondicionamento dos camiños rurais e veciñais, así como os traballos relacionados coas actividades forestais, de xardinería e de limpeza.
O convenio asinado no mes de agosto entre o Concello e a Deputación, que tamén contempla a financiación destes recursos, busca facilitar o mantemento das infraestruturas do municipio e mellorar a calidade das actividades agrogandeiras, vitivinícolas e forestais. A nova maquinaria será clave para continuar coas tarefas de roza e limpeza, contribuíndo ao bo estado dos camiños e ao desenvolvemento das actividades produtivas no rural.•
Cargando ...
