A Xunta de Galicia abriu este xoves o prazo para que as empresas do sector forestal poidan solicitar as novas axudas destinadas á modernización das instalacións e á adquisición de maquinaria avanzada. A convocatoria, xestionada pola Axencia Galega da Industria Forestal (Xera), conta cun orzamento de 10 millóns de euros para o período 2025-2026, con subvencións que oscilan entre os 50.000 e os 200.000 euros. O prazo de presentación de solicitudes estará aberto ata o 27 de marzo.
A conselleira de Economía e Industria, María Jesús Lorenzana, reuniuse cos representantes da Asociación Provincial de Empresarios da Primeira Transformación da Madeira (LugoMadera), que agrupa 272 empresas lucenses, o 48% do total galego. Durante o encontro, abordáronse os retos do sector e destacouse a importancia da investigación forestal e a mellora xenética dos recursos.
A convocatoria inclúe cinco liñas de axuda: adquisición de maquinaria para tratamentos silvícolas; medición de masas forestais; comercialización da castaña e da resina; compra de equipos portátiles e sistemas de clasificación automática da madeira; e unha nova liña para a medición e trazabilidade do inventario forestal. O obxectivo é reforzar a competitividade dun sector que representa o 12% do emprego industrial en Galicia, con máis de 3.000 empresas e unha facturación que supera os 2.400 millóns de euros anuais.
Lorenzana destacou a necesidade de reforzar as cadeas de valor dentro da comunidade, garantindo que os recursos forestais galegos xeren emprego.•
Cargando ...
