A Feira do Viño de Chantada celebra este ano a súa XLII edición, que terá lugar do 7 ao 9 de marzo e dará o pistoletazo de saída ás Feiras do Viño na D.O. Ribeira Sacra. O evento, que se celebrará na carpa instalada na Avda. de Monforte, contará coa participación de 15 adegas do municipio. Este ano, a organización introduce novidades no formato, como a incorporación dunha carpa dedicada á exposición e venda de produtos gastronómicos. A feira abrirá as súas portas o venres 7 de marzo ás 20:00 h. co inicio das actividades de degustación nos postos das adegas participantes. A noite estará animada pola música do grupo América, que subirá ao escenario ás 23:30 h. O sábado 8 de marzo será un día repleto de actividades. Ás 10:00 h. celebrarase a cata oficial, un espazo clave para os profesionais do sector. Tamén haberá espazo para a música e a cultura popular, cunha actuación do grupo “Searas” ás 11:30 h. e a lectura do manifesto polo Día Internacional da Muller ás 12:00 h. Ás 12:10 h. terá lugar a actuación da Agrupación Tradicional da Casa da Música, e ás 13:00 h., os asistentes poderán gozar do concerto da Banda de Música de Chantada. A xornada continuará cunha serie de actuacións nas que se inclúen as charangas “Union Phenosa”, “Festicultores Troupe” e “Searas”, que animarán a tarde a partir das 17:00 h. A IX Cata Popular, que terá lugar de 17:30 h a 19:00 h., é outra das citas máis agardadas, cun prezo de 5€ por entrada.
O domingo 9 de marzo, as actividades darán comezo ás 11:30 h. coas actuacións dos gaiteiros “Os Barrios” e a charanga “NBA”. Ás 13:00 h. terá lugar o pregón oficial da Feira, a cargo de José Luis Blanco Diéguez, natural de Chantada e CEO da empresa alemá Nordex. Despois do pregón, celebraranse os premios da XLII Feira do Viño, na carpa principal, ás 13:30 h. A xornada rematará coa actuación da Orquestra Compostela ás 21:00 h.
Ademais, o evento tamén contará cunha Ocioteca Infantil, na Casa da Música. O Auditorio Municipal acollerá o V Túnel do Viño.
Ademais, coincidirá coa Feira de oportunidades e a Mostra de Produtos de Artesanía, que organiza a Asociación de Empresarios de Chantada.
O concelleiro de Cultura, Manuel Diéguez convida a todo o mundo a asistir á primeira Feira do Viño da D.O. e confía en que a climatoloxía acompañe, “Esperamos que nesta ocasión teñamos mellor tempo que o ano pasado, en todo caso as persoas fieis á Feira, que cada ano son máis, veñen independentemente do clima. Cada ano acompáñanos máis xente para probar o viño das ribeiras de Chantada, iso quere dicir que tratamos ben á xente e que están desexando festexar os nosos viños”•
Cargando ...
