O Parlamento galego aprobou unha iniciativa do BNG para dotar o Hospital Comarcal de Monforte cun novo mamógrafo no prazo dun mes. O deputado nacionalista Iago Suárez, encargado de defender a proposta na Comisión de Sanidade, subliñou a urxencia da medida, pois afecta a pacientes de once concellos do sur de Lugo. Na súa intervención, advertiu de que a situación sanitaria na comarca é cada vez máis grave debido á falta de profesionais en servizos esenciais como pediatría, dixestivo, psiquiatría, rehabilitación, radioloxía e laboratorio. Tamén destacou que Monforte é o único hospital galego sen un médico específico para o servizo de Hospital a Domicilio (HADO), ao que se suman carencias de celadores e técnicos en coidados auxiliares de enfermaría (TCAE).
Suárez denunciou que a xestión da sanidade na comarca leva anos deteriorándose, o que provocou mobilizacións de persoal sanitario e pacientes á porta do hospital para esixir solucións á Xunta. “Non é culpa dos profesionais, a culpa é dunha xestión deficiente que obriga a moitos a marchar fóra”, afirmou.
A proposición tamén incluía a demanda de garantir a cobertura das prazas vacantes no hospital, pero o acordo quedou condicionado á existencia de persoal sanitario dispoñible. Ademais, o Parlamento rexeitou outro punto da iniciativa que instaba a identificar as mulleres que se someteron a mamografías desde xuño para ofrecerlles repetir as probas, ante o risco de resultados erróneos.
Suárez puxo como exemplo o caso dunha paciente á que non se lle detectou un cancro nunha mamografía realizada en Monforte, pero que foi diagnosticada posteriormente en Lugo. Para o deputado, este feito evidencia a necesidade dun equipo en bo estado, pois os fallos do mamógrafo afectan directamente á saúde das mulleres da comarca.•
Cargando ...
