A XXXIII Festa do Caldo de Ósos celebrarase en Taboada esta fin de semana, os días 1 e 2 de marzo, cunha ampla programación que combina gastronomía, cultura e recoñecemento ás mulleres do municipio. A festa foi presentada nun acto no que participaron representantes municipais e institucionais.
O domingo 2 de marzo será a xornada central da celebración, cunha degustación gratuíta do caldo na Praza de Riazón. Ademais, a hostalaría local ofrecerá un menú especial no que o caldo de ósos compartirá protagonismo con costela asada, filloas con mel, queixo con marmelo e viño da Ribeira Sacra.
A programación deste ano pon o foco na importancia do caldo como elemento identitario de Taboada. Durante a presentación, o concelleiro de Cultura, Manuel Diéguez, destacou que a festa non é só un evento gastronómico, senón unha expresión do patrimonio cultural e inmaterial do municipio.
No acto participaron Carmen José López, directora xeral de Emprego e Comercio da Xunta de Galicia; Iria Castro, deputada de Cultura da Deputación Provincial; e o alcalde de Taboada, Roi Rigueira. Todas as intervencións puxeron en valor o esforzo organizativo e a dedicación das mulleres de Taboada na preservación desta tradición.
O cartel obra de Rosa de Cabanas, foi eloxiado polos asistentes, e servirá de marco para unha das novidades destacadas: a exposición «As donas do Caldo de Ósos», que se inaugurará o sábado e recolle o traballo de catro fotógrafas retratando doce mulleres do municipio nas súa cociñas.
A pregoeira desta edición será Olga Novo, poeta e profesora, Premio Nacional de Poesía en 2020. Natural da Pobra do Brollón, Novo destacará no seu pregón o valor da memoria e da tradición como sinais de identidade.
A XXXIII Festa do Caldo de Ósos promete, un ano máis, converter a Taboada nun punto de encontro para veciñanza e visitantes que desexen gozar dunha fin de semana de tradición, sabor e cultura.•
Cargando ...
