O Concello de Monforte segue avanzando no proxecto da Praia Fluvial e Área Recreativa de Ribasaltas, unha iniciativa que transformará a marxe dereita do río Cabe nun amplo espazo de lecer. O alcalde, José Tomé Roca presentou o Plan Especial que define as actuacións necesarias para a materialización desta infraestrutura, que conta cunha superficie de 138.282 metros cadrados e un investimento estimado de máis de cinco millóns de euros.
O documento urbanístico, redactado pola UTE Ribasaltas, formada polas empresas Monsa Urbanismo SL e Estudios Técnicos Topysa SL, inclúe a planificación de diferentes dotacións, entre elas unha zona de baño con azud desmontable, unha praia fluvial de 1,4 hectáreas, un espazo verde con céspede de 2 hectáreas e unha pradeira de 4,8 hectáreas. Ademais, prevese a construción dunha área de hostalería, un parque infantil de 1.200 metros cadrados, un estacionamento con capacidade para máis de 400 vehículos, sendas peonís e edificacións auxiliares.
O concurso para a redacción do Plan Especial foi publicado o 25 de outubro de 2023 cun orzamento de 96.800 euros. Un equipo de tres enxeñeiros valorou as propostas técnicas presentadas, resultando adxudicataria a UTE Ribasaltas, que formalizou o contrato o 27 de decembro de 2023 por un importe de 82.828 euros. Segundo explicou o alcalde, este documento urbanístico servirá de base para definir as futuras infraestruturas e servizos da zona, permitindo posteriormente a redacción do proxecto construtivo.
Tras a elaboración do borrador inicial, o Plan foi enviado á Consellería de Medio Ambiente e Cambio Climático da Xunta de Galicia, que determinou que debería someterse a unha avaliación ambiental estratéxica ordinaria. A Dirección Xeral de Calidade Ambiental e Sostibilidade emitiu un informe favorable, permitindo que o documento avanzase cara á súa aprobación inicial, feito que tivo lugar no pasado Pleno do luns 24 de febreiro.
Unha vez superado este trámite, o documento someterase a información pública durante dous meses, conforme ao artigo 75 da Lei do Solo de Galicia. Durante este período, será publicado no Diario Oficial de Galicia e nos principais medios de comunicación da provincia, ademais de notificarse individualmente aos propietarios dos terreos afectados. Posteriormente, o Concello remitirá o Plan á Xunta de Galicia para a súa avaliación sectorial, cuxos informes deberán emitirse nun prazo máximo de tres meses. Superados estes pasos, aprobarase provisionalmente o contido do Plan antes de ser sometido a aprobación definitiva polo Pleno municipal.
Unha vez ratificado, procederase á expropiación dos terreos afectados, un proceso que será xestionado polo Servizo de Expropiacións da Deputación de Lugo. Paralelamente, licitarase a redacción do proxecto construtivo, que definirá en detalle as actuacións necesarias para a urbanización, dotación de servizos e edificacións previstas no Plan Especial. O documento someterase a exposición pública durante un mes antes da súa aprobación definitiva.
Finalmente, trala aprobación do proxecto construtivo, abrirase o proceso de licitación das obras, que darán forma á nova Praia Fluvial e Área Recreativa de Monforte. Segundo destacou o alcalde José Tomé, este espazo converterase nun referente no interior de Galicia, cunha capacidade estimada para 20.000 persoas e unha oferta de servizos que mellorará a calidade de vida da cidadanía e potenciará o atractivo turístico da cidade.
O PP CALIFICA O ANUNCIO DE “SIMPLE PROMESA ELECTORAL”
Os concelleiros do Grupo Municipal do PP de Monforte aseguran que José Tomé renunciou á súa promesa de crear unha praia fluvial no municipio antes de 2027. Durante o pasado pleno de febreiro, según os populares, Tomé alegou que os trámites administrativos impedirían que a infraestrutura estivese lista antes das próximas eleccións. Katy Varela, voceira do PP, criticou a falta de accións previas e afirmou que “non nos sorprende esta situación, xa que estamos máis que acostumados a ter un alcalde de titulares que logo quedan niso e non hai realidades constatables para os monfortinos”.•
Cargando ...
