A Deputación de Lugo financiará a rehabilitación de case dous quilómetros da travesía que conecta Monforte con Sober, cunha inversión de case 300.000 euros
O alcalde de Monforte, José Tomé Roca, anunciou que se levará a cabo a mellora da estrada LU-P-3201, tamén coñecida como Rúa ou Estrada de Sober. Trátase dunha vía que conecta os concellos de Monforte e Sober, sendo unha das principais entradas á cidade.
A actuación abranguerá desde o punto quilométrico 0+814, á altura da Capela de San Lázaro, ata o quilómetro 2+540, na parroquia de Piñeira. Ademais, incluirase a rehabilitación dun tramo da estrada vella de Monforte a Sober de 267 metros, no núcleo de Piñeira, sumando un total de 1.993 metros de melloras.
O proxecto conta cun orzamento de 294.190,37 euros, asumido integramente pola Deputación de Lugo. O prazo de execución previsto será de catro meses unha vez adxudicada a obra e asinada a acta de replanteo, polo que os traballos desenvolveranse entre finais da primavera e comezos do verán.
Entre as actuacións previstas, levarase a cabo a reapertura das cunetas para recuperar a súa capacidade de drenaxe e a limpeza dos elementos de evacuación de augas. Ademais, renovarase a canaleta situada baixo o paso a nivel.
Na zona urbana, fresarase o firme existente para aplicar unha nova capa de mestura bituminosa, garantindo unha mellor regularidade superficial e unha maior capacidade estrutural da vía. No tramo entre o núcleo e a última vivenda da marxe esquerda pavimentarase con formigón alisado, incluíndo a instalación dunha rigola prefabricada para a separación entre a estrada e o novo pavimento.
A mellora tamén contemplará a pavimentación da marxe dereita entre a zona de vivendas e un sendeiro, o entubado de cunetas e a instalación dunha cuneta transitable que conectará coas beirarrúas existentes. Tamén se optimizarán os estacionamentos diante do IES A Pinguela e do Obradoiro de Emprego.
Unha vez completada a pavimentación, realizarase o pintado da vía con marcas viarias reflexivas brancas, cebreados e a sinalización de paradas de autobús e pasos de peóns ao longo de toda a travesía, dende a Capela de San Lázaro ata a entrada en Sober. Ademais, instalaranse bandas sonoras para reducir a velocidade do tráfico na contorna do IES A Pinguela e renovarase toda a sinalización vertical deteriorada.
O Alcalde, José Tomé destacou que esta intervención mellorará a circulación entre Monforte e Sober, beneficiando tanto os veciños da Pinguela como os usuarios das instalacións deportivas e educativas situadas nesta área.•
Cargando ...
