A XXV Mostra do Aceite de Quiroga incorpora un congreso e nomeará o seu primeiro embaixador

A XXV Mostra do Aceite de Quiroga chega con novidades, entre as que destacan a celebración do “II Congreso do Aceite de Oliva de Quiroga”, a dobre localización das actividades e a creación da figura do “Embaixador do Aceite de Quiroga”.
O congreso terá lugar o sábado 29 no Auditorio Municipal, desde as 17:00 horas, con intervencións de expertos do sector. Alfonso Rodríguez Udías, presidente da APAAG, abordará a situación do cultivo da oliveira en Galicia, mentres que a científica do CSIC Carmen Martínez falará sobre novas variedades autóctonas. Ana Belén Crujeiras Martínez, investigadora do IDIS, e o chef Kike Piñeiro analizarán os beneficios do aceite de oliva extra na alimentación saudable. O evento concluirá cunha demostración culinaria con aceite de Quiroga a cargo dos chefs Gerson Iglesias, Diego Domínguez e Maica Couto. O grupo O Recanto poñerá o peche musical.
O domingo 30 a mostra terá unha dobre localización. A partir das 11:00 horas, os postos de venda instalaranse na praza do Auditorio Municipal, con actividades complementarias nas instalacións municipais. Ademais, o Muíño de Aceite de Bendilló funcionará para que os visitantes poidan coñecer o proceso tradicional de elaboración. Haberá autobuses gratuítos desde a praza do Auditorio ás 11:00, 12:00 e 13:00 horas.
Sete olivicultores participarán na mostra, declarada Festa de Interese Turístico de Galicia: Ouro de Quiroga, Jesús Bao Mondelo, Aceiroga, Jesús Arias Rodríguez, Pedro Soto Losada, Val de Quiroga e Cento x Cento. Todos cumpriron os requisitos de rexistro sanitario e produción mínima de 200 litros de aceite.
Para conmemorar os 25 anos do evento, organizaranse degustacións dos aceites participantes na sala de catas do Museo Etnográfico ás 12:00, 13:00 e 16:30 horas. Outra das grandes novidades será a figura do Embaixador do Aceite de Quiroga. Ás 13:30, o chef Kike Piñeiro será nomeado o primeiro embaixador e, a continuación, ofrecerá unha demostración culinaria co aceite como protagonista.
O recinto feiral da Mostra contará coa animación musical do grupo de música tradicional “O Ventosiño”.•