O secretario xeral do PSdeG, José Ramón Gómez Besteiro, clausurou o 15º Congreso Nacional do Partido Socialista de Galicia cunha chamada á mobilización, asegurando que a súa formación é a única esquerda con capacidade para gobernar Galicia. «Somos a esquerda que pode, a única que pode», proclamou ante un auditorio repleto de militantes e simpatizantes.
Acompañado polo presidente do Goberno e secretario xeral do PSOE, Pedro Sánchez, Besteiro destacou as políticas progresistas impulsadas polo Executivo central e denunciou a xestión do PP en Galicia. Criticou a negativa do presidente, Alfonso Rueda, a aceptar a condonación de 4.000 millóns de euros da débeda autonómica, cualificándoa de «sectarismo».
No seu discurso, o líder socialista puxo o foco en sectores clave como a sanidade, denunciando que máis de 200.000 galegos agardan por unha cita cun especialista, e asegurou que o PSdeG reforzará a atención primaria. Anunciou a creación dun Banco Público de Alugueiro para facilitar o acceso á vivenda da mocidade.
Besteiro comprometeuse a traballar por unha Galicia «ben conectada», defendendo a reindustrialización e a transición ecolóxica con transparencia e sen especulación. Criticou a «manipulación» dos medios públicos galegos e avogou pola pluralidade informativa. Finalmente, alertou sobre o perigo do ascenso da extrema dereita, asegurando que o PSdeG liderará o cambio político.•
Cargando ...
