O Concello de Pantón converterase esta fin de semana no epicentro do enduro coa celebración da primeira proba do Campionato de España, organizada polo MotoClub A Peroxa en colaboración co Concello e outras entidades. Con máis de 150 pilotos inscritos, a cita bate récords de participación na última década, destacando a presenza de case 30 galegos e dunha ducia de habituais do circuíto mundial.
A proba foi presentada esta semana coa asistencia do alcalde de Pantón, José Luis Álvarez; a concelleira de Deportes, Cristina Domínguez; o xefe do servizo provincial de Deportes de Lugo, Manuel Otero; Javier Quintas, do MotoClub A Peroxa; e representantes do monte veciñal de Eiré e da adega Finca Míllara, polas que discorren os circuítos.
A competición dará comezo o sábado 15 de marzo ás 10:00 horas desde a Praza do Concello, e o domingo arrancará ás 9:00 horas. Os pilotos deberán completar catro voltas aos tres circuítos deseñados para a ocasión: Monte de Eiré, Ferreiroá e Monte Baliño. A entrega de premios está prevista para as 17:00 horas en ambas xornadas.
O percorrido está pensado para facilitar o seguimento do público, cunha distancia de 600 metros entre dous dos puntos máis destacados: o Pazo de Ferreiroá e a contorna do Colexio Monte Baliño. A terceira especial, situada na comunidade de montes de Eiré, no alto de Guítara, é descrita pola organización como “a mellor do Campionato de España”, ofrecendo un espectáculo único.
Javier Quintas destacou a calidade do trazado, no que os espectadores poderán seguir a carreira con comodidade, xa que os circuítos están moi próximos ao asfalto e permiten unha ampla visibilidade. Pola súa parte, Manuel Otero subliñou a importancia de eventos como este para a promoción deportiva e turística da Ribeira Sacra. O alcalde de Pantón, José Luis Álvarez anima á participación da xente e desexa poder seguir contando no futuro con esta celebración que atrae cada ano a Pantón a centos de visitantes.•
Cargando ...
