O presidente da Deputación de Lugo, José Tomé, inaugurou a tempada 2025 das rutas fluviais da Ribeira Sacra, un dos principais atractivos turísticos da provincia. A nova tempada comeza cunha gran expectación, rexistrando un incremento do 22% nas reservas en comparación co mesmo período de 2024. Durante o acto, Tomé destacou a importancia deste servizo como motor económico para a comarca, favorecendo o turismo, a hostalería e o comercio local.
Na viaxe inaugural, que percorreu os Canóns do Sil, participaron diversas autoridades, entre elas a primeira tenente de alcalde de Monforte, Gloria Prada, e os representantes dos concellos de Sober e Castro Caldelas. O presidente da Deputación subliñou que as rutas fluviais ofrecen unha perspectiva única da paisaxe e do patrimonio cultural da Ribeira Sacra, consolidándose como unha das propostas turísticas máis atractivas de Galicia.
A tempada arrinca cun total de 15.453 reservas, unha cifra que reflicte o crecemento da demanda. O servizo manterá as dúas rutas habituais: a do Canón do Sil, con saída desde o embarcadoiro da Deputación en Ponte do Sil, e a do Cabo do Mundo, con inicio en Belesar Pobo, no Saviñao. Ambas terán unha duración aproximada de dúzas horas.
O servizo contará con distintas embarcacións: na ruta do Canón do Sil, haberá dúa travesías diarias con 159 prazas dispoñibles, mentres que a ruta do Cabo do Mundo terá unha capacidade de 63 pasaxeiros. O calendario está estruturado para garantir a dispoñibilidade durante os meses de maior demanda, operando de xeito continuado na Semana Santa e durante o verán, con servizo de luns a domingo nos meses de xuño, xullo, agosto e setembro. A partir de outubro, as viaxes reduciranse progresivamente.
Para adquirir billetes, os interesados poden realizar a súa reserva a través da páxina web reservas.rutasembalses.es.A Deputación manifesta o seu compromiso cun modelo de turismo sostible que favoreza o desenvolvemento económico e social da Ribeira Sacra.•
Cargando ...
