O Concurso de Proxectos Empresariais Semente Ribeira Sacra celebra a súa undécima edición co obxectivo de apoiar o emprendemento e promover proxectos innovadores que contribúan ao desenvolvemento do medio rural e á valorización dos recursos da Ribeira Sacra. A convocatoria está aberta a persoas de calquera lugar, aínda que se priorizan as iniciativas vinculadas ao territorio.
Nesta edición, o certame repartirá 20.000 euros en premios: 10.000 euros para o primeiro clasificado, 6.000 para o segundo e 4.000 para o terceiro. Ademais, os dez proxectos finalistas poderán participar nun plan formativo que se desenvolverá no primeiro semestre de 2026.
O prazo para presentar ideas está aberto desde o 15 de marzo ata o 31 de maio, a través da web sementeribeirasacra.org, cunha inscrición gratuíta. As propostas deberán incluír un título, unha descrición xeral, a oportunidade do proxecto, puntos fortes e un calendario de implantación.
O xurado publicará o 23 de xullo a listaxe cos dez proxectos seleccionados, que terán ata o 30 de setembro para entregar a documentación final. A defensa pública das iniciativas e a entrega de premios realizaranse o 8 de novembro no Parador de Turismo de Monforte de Lemos.•
Cargando ...
