A conselleira do Medio Rural, María José Gómez, acompañada polo director da Axencia Galega da Calidade Alimentaria, Martín Alemparte, participou na primeira xornada da feira internacional ProWein, que se celebrou en Düsseldorf. Alí, puxo en valor a calidade e o traballo dos produtores vitivinícolas galegos, destacando a importancia da súa presenza neste evento para fortalecer a súa competitividade e expandir a súa pegada nos mercados europeos.
O espazo expositivo da Xunta acolle a representación de 20 adegas galegas e os consellos reguladores das denominacións de orixe Valdeorras, Ribeira Sacra, Ribeiro e Monterrei. Segundo indicou Gómez, as DO galegas exportan anualmente ao mercado europeo uns 3,5 millóns de litros de viño, e eventos coma este contribúuen a incrementar esa cifra.
Durante a súa intervención, a conselleira subliñou o compromiso do Goberno galego co sector, a través de iniciativas como a Estratexia de Dinamización Económica, Territorial e Turística das Comarcas Vitivinícolas, as axudas para a promoción en mercados exteriores e os fondos destinados á elaboración e comercialización de produtos vitivinícolas. En febreiro resolvéronse axudas por valor de 6,5 millóns de euros para 41 beneficiarios, e en breve abrirase unha nova convocatoria de subvencións dotada con 2 millóns de euros.
A participación galega en ProWein inclúe un túnel do viño, augardentes e licores premiados nas Catas de Galicia 2024. Este espazo, coordinado polo sumiller Alejandro Paadín, ofrece degustacións harmonizadas con outros produtos galegos de calidade diferenciada.•
Cargando ...
