A remodelación integral que quere levar a cabo a Xunta ten como prioridade a reforma da área de hospitalización e de consultas externas, actuando en máis de 11.000 m2, cun investimento próximo aos 30 millóns de euros
O Hospital Público de Monforte de Lemos continúa mellorando as súas infraestruturas co obxectivo de ofrecer unha asistencia sanitaria de calidade. O conselleiro de Sanidade, Antonio Gómez Caamaño, supervisou recentemente as obras do novo Laboratorio de Microbioloxía e da área de Cardioloxía, que foron financiadas cun millón de euros e que supoñen un avance importante para o centro hospitalario. A reforma mellora a superficie dispoñible, optimiza espazos e introduce equipamento renovado, o que incrementa a eficiencia no funcionamento do hospital.
O novo Laboratorio de Microbioloxía conecta co laboratorio de análises clínicas e de bioquímica, permitindo un funcionamento máis coordinado. O espazo está dividido en tres salas illadas con control de presión, conta con almacéns, cámara frigorífica, microscopios e un despacho para o responsable da unidade. A nova área de Cardioloxía, por súa parte, dispón de dúas consultas con iluminación natural, unha sala de marcapasos, outra para probas de esforzo e unha máis para realizar ecografías, mellorando a capacidade de diagnóstico e tratamento para os pacientes.
Estes cambios son parte dunha serie de melloras no centro sanitario que tamén inclúen investimentos en outros laboratorios e no servizo de Farmacia, que nos últimos anos sumaron dous millóns de euros. Ademais, este mes comenzaron as obras para crear novas áreas de Pneumoloxía e Dixestivo cun investimento adicional dun millón de euros, o que reflicte o compromiso co hospital de Monforte e a mellora constante da atención aos pacientes. Neste sentido, en total, os investimentos realizados nos últimos dous anos ascenden a 6 millóns de euros, subliñando o apoio ás infraestruturas sanitarias no ámbito comarcal.
O conselleiro tamén avanzou que o Hospital de Monforte se prepara para a próxima licitación do Plan Director do centro, que inclúe a remodelación integral de 11.000 m², cun investimento previsto de 30 millóns de euros. Esta reforma implicará melloras nas áreas de hospitalización e nas consultas externas. O proxecto será desenvolvido por fases, co obxectivo de licitar a redacción do proxecto básico e a execución da Fase I durante o presente ano.
Ademais, Gómez Caamaño anunciou a próxima posta en funcionamento dun novo mamógrafo no hospital, que estará operativo xa na vindeira semana. Este equipamento substitúe o anterior, que presentou incidencias durante a súa instalación, motivo polo cal o conselleiro pediu desculpas polas molestias ocasionadas ás pacientes.
No ámbito do equipamento médico, a Xunta tamén licitou a subministración dun sistema de resonancia magnética móbil. A licitación, que se publicou recentemente no Portal de Contratos Públicos, ten un importe de 329.120 euros e un prazo de seis meses para a súa contratación. Este sistema permitirá mellorar o acceso aos servizos de resonancia en hospitais comarcais, evitando desprazamentos e mellorando a accesibilidade ás exploracións. O Servizo Galego de Saúde tamén renovará unha das catro resonancias magnéticas móbiles existentes, que realizan anualmente máis de 8.300 exploracións. O contrato inclúe tamén o mantemento preventivo e correctivo do equipamento, para garantir a súa óptima utilización e reducir ao máximo os tempos de parada en caso de avaría. As empresas interesadas teñen prazo até o 30 de abril para presentar as súas ofertas.
Estas actuacións súmanse aos múltiples investimentos que están a mellorar os centros hospitalarios de Galicia, co obxectivo de garantir a mellor calidade asistencial para todos os cidadáns. O Hospital de Monforte , según a Xunta, segue a ser un exemplo do compromiso coas infraestruturas sanitarias e a mellora continua dos servizos para os usuarios do Sergas.•
Cargando ...
