O líder socialista aposta por reforzar a estrutura local e comarcal do partido e preparar o PSdeG para afrontar novos retos electorais
José Tomé Roca, presidente da Deputación de Lugo e alcalde de Monforte, confirmou a súa precandidatura á reelección como secretario xeral do PSdeG-PSOE na provincia de Lugo. Con ampla traxectoria política e orgánica, Tomé reafirma o seu compromiso cun partido forte e unido, que se propoña defender os intereses da provincia fronte a un Partido Popular que, segundo el, non ten en conta as necesidades da cidadanía. «Nós traballamos por máis sanidade, máis emprego, máis industria», afirmou, facendo especial referencia á falta de apoio do PP aos sectores estratéxicos de Lugo.
Tomé afronta esta nova etapa con ilusión, co obxectivo de seguir fortalecendo o proxecto socialista na provincia. A súa proposta inclúe non só a consolidación das alcaldías socialistas, senón tamén a recuperación das perdidas e a renovación do Goberno da Deputación. «Debemos traballar por un Lugo con máis oportunidades, no que a reindustrialización sostible e a creación de emprego sexan a base do desenvolvemento», sinalou. Ademais, aposta por reforzar as agrupacións locais, dotalas dos recursos necesarios e darlles un maior protagonismo no proceso político. Tomé tamén destacou a importancia da unidade interna, a participación activa e a coordinación entre as diferentes agrupacións, especialmente na defensa dos servizos públicos, o benestar social e o desenvolvemento económico.
O 5º Congreso Provincial do PSdeG-PSOE, celebrarase o 10 de maio en Lugo, será clave para consolidar a estrutura do partido na provincia.•
Cargando ...
