O campo de fútbol de Os Medos mellora a súa eficiencia enerxética

A directora xeral de Administración Local, Natalia Prieto, xunto co delegado territorial da Xunta en Lugo, Javier Arias, visitaron recentemente o campo de fútbol Os Medos na Pobra do Brollón para comprobar as melloras de eficiencia enerxética levadas a cabo co apoio do Goberno galego. As actuacións, cun investimento de 51.600 euros, foron financiadas a través do Fondo de Cooperación Local. As melloras inclúen a instalación de bombas de calor no sistema de auga quente sanitaria, a substitución de luminarias e outras obras no sistema eléctrico, así como a cubrición con paneis sándwich para mellorar o illamento térmico do recinto. O obxectivo das actuacións é mellorar o aforro enerxético e garantir o confort na práctica deportiva. A directora xeral lembrou que desde a semana pasada está aberto o prazo para a nova convocatoria de axudas do fondo adicional do Fondo de Cooperación Local, cun orzamento de 5 millóns de euros, e animou aos concellos a solicitar as axudas para mellorar a eficiencia enerxética nas súas instalacións. As achegas poden chegar aos 60.000 euros.•