O Concello de Chantada destina 45.000 euros ás axudas á natalidade para 2025

O Concello de Chantada convocou as axudas á natalidade para o ano 2025. En total, destina 45.000 euros a esta liña de subvencións.
Hai dúas modalidades. Por unha banda, concederanse 800 euros por cada nacemento ou adopción rexistrados entre o 1 de setembro de 2024 e o 31 de decembro de 2025, sempre que a familia non recibise xa esta axuda na convocatoria anterior. Por outra banda, para o segundo ano de vida do menor, poderanse solicitar 400 euros por cada neno ou nena nado ou adoptado entre o 1 de xaneiro e o 31 de decembro de 2024.
Para optar a estas axudas, os pais deberán estar empadroados en Chantada desde polo menos un ano antes do nacemento ou adopción, e contar coa residencia legal en España. Os menores deberán estar inscritos no padrón do municipio, e tanto os proxenitores como os fillos deberán comprometerse a manter o empadroamento durante catro anos.
O prazo para presentar solicitudes será de catro meses desde o nacemento ou adopción. Os trámites realizaranse no Concello, acompañando a solicitude co libro de familia, DNI ou NIE, certificado de nacemento ou adopción, xustificante da conta bancaria, declaracións sobre outras axudas recibidas e compromisos de residencia e devolución da axuda en caso de incumprimento.
A concesión realizarase por concorrencia competitiva e resolverase nun prazo máximo de tres meses. Estas achegas son compatibles con outras axudas similares. O Concello anima ás familias a aproveitar esta medida para facer fronte aos primeiros gastos da crianza e contribuír a reforzar a poboación local.•