As obras, cun prazo estimado de dous meses, incluirán novos firmes, mellora das zonas verdes, iluminación e novo mobiliario urbano
O Concello de Monforte de Lemos impulsará nas vindeiras semanas unha renovación integral do Parque da Compañía, situado na contorna do Colexio de Nosa Señora da Antiga. A actuación, cuxo contrato se licitará mediante concurso aberto, abranguerá unha superficie de 10.025 metros cadrados e contará cun prazo estimado de execución de dous meses desde a sinatura da acta de replanteo, agás que circunstancias meteorolóxicas obriguen a suspendelo.
O proxecto prevé a substitución do firme do percorrido peonil e do carril bici, ampliando a súa anchura ata dous metros e empregando formigón fratasado de 20 centímetros de grosor, máis seguro e cómodo para ciclistas e peóns. Ademais, renovaranse as zonas verdes, retirando arbustos e pequenas árbores que dificultan o mantemento, para substituílas por céspede con rego automático.
Inclúese tamén a eliminación de bordos que poidan supoñer risco de caída e o recheo da zona central con jabre compactado. Procederase ao levantamento e recolocación do mobiliario urbano existente, así como á instalación de novos bancos, papeleiras e fontes. Tamén se mellorará a iluminación, coa colocación de farolas con luminarias LED, e realizarase o pintado de marcas viarias e símbolos no percorrido peonil e carril bici. O Alcalde, José Tomé, indicou que “con esta actuación, seguimos a completar as accións de mellora que dende o Concello levamos a cabo na zona da Compañía, e que significaron a consecución dun novo Parque Infantil (177.000€), a construción dunha pista de Skate (77.000€), a mellora da Pista Polideportiva da Compañía (48.000€) e a mellora da fonte cibernética da praza da Compañía (62.000€), polo que o investimento total, incluído a nova actuación presentada hoxe, que destinamos nos últimos para mellorar a que é unha das zonas de esparcemento e lecer máis utilizadas da cidade, alcanza os 636.000 euros”.•
Cargando ...
