O Concello de Pantón foi o escenario, na fin de semana do 15 e 16 de marzo, da primeira proba do Campionato de España de Enduro, organizada polo MotoClub A Peroxa coa colaboración do Concello, a Xunta de Galicia e outras entidades. A cita congregou a máis de 150 motoristas nos circuítos de Monte de Eiré, Ferreiroá e Monte Baliño, que se caracterizan pola súa beleza natural.
As boas condicións climatolóxicas permitiron que os pilotos e o público gozaran dunha fin de semana espectacular, completando tres especiais naturais e case dúas horas de cronometradas. O alcalde de Pantón, José Luis Álvarez, destacou o éxito da proba, que atraiu a moitos visitantes ao municipio. “As propostas de Enduro que celebramos en Pantón son cada vez máis recoñecidas. Os espazos naturais e as paisaxes da zona son un escenario ideal para este tipo de competicións, facendo que os motoristas e os afeccionados disfruten dunha experiencia única”, asegurou o rexedor.
Na proba de Pantón, o piloto francés Antoine Magain dominou a clasificación e chega como líder ao próximo evento do Campionato, que se celebrará en Gironella (Barcelona) o 24 de abril. Magain foi acompañado no podio por Sergio Navarro (E2) e Jaume Betriu (E3). A cita tamén destacou a ausencia de Josep García, actual campión, que se recupera dunha lesión. Albin Elowson e Alejandro Navarro repartíronse a cuarta posición o sábado e o domingo.
Na categoría Enduro1, Álex Puey celebrou o seu primeiro dobrete de categoría, mentres que en mulleres Rosie Rowett gañou a proba, superando a María San Miguel e Mireia Rabionet. Unha das actuacións máis destacadas foi a de Elena López, de Samos, que segue sumando puntos no Campionato.
Este evento amosou a forza de Pantón como destino para grandes citas deportivas, para promocionar os recursos naturais e turísticos da zona.•
Cargando ...
