O presidente da Xunta, Alfonso Rueda, participou este mércores no Teatro Principal de Ourense na entrega das Distincións ao Mérito Deportivo de Galicia, que nesta edición recoñeceron a labor de 99 deportistas e entidades. Entre os premiados destacaron catro monfortinos e o Club Lemos, galardoados pola súa contribución ao fomento do deporte na comunidade.
A atleta Saleta Fernández, recentemente retirada da competición, foi unha das galardoadas, recoñecendo a súa traxectoria e dedicación ao atletismo. Ademais, recibiu a distinción José Luis Sánchez, expresidente de A Pinguela, en recoñecemento á súa labor na xestión e promoción do deporte local.
Tamén foron homenaxeados José Antonio Díaz, expresidente do Club Lemos, e Ramón Rodríguez Buján, directivo e expresidente do Calasancio, polos seus anos de esforzo e dedicación ao desenvolvemento deportivo en Monforte. O Club Lemos, pola súa banda, foi recoñecido como club centenario, destacando a súa longa traxectoria na promoción do fútbol galego. O actual presidente da entidade, Antonio López, foi o encargado de recoller a distinción.
Durante a cerimonia, o presidente da Xunta puxo en valor o impacto positivo do deporte na sociedade galega, destacando a súa capacidade para fomentar hábitos saudables e impulsar a economía. Rueda reafirmou o compromiso do Goberno galego co apoio á práctica deportiva, desde o deporte base ata a profesionalización, a través de infraestruturas, programas de axuda e medidas para facilitar a conciliación dos deportistas.
Galicia pechou 2024 cunha cifra récord de licenzas deportivas, acadando preto de 320.000, das cales 98.000 corresponden a mulleres. Ademais, conta con 1.500 deportistas de alto rendemento, o que supón un incremento do 350% nos últimos 15 anos. No eido escolar, máis de 150.000 nenos e nenas participan no programa XOGADE, que combina a competición deportiva coa actividade recreativa nos centros educativos.
As Distincións ao Mérito Deportivo, promovidas pola Xunta de Galicia, poñen en valor o esforzo e dedicación de persoas e entidades que contribúan á dinamización do deporte en Galicia, sendo esta unha das citas anuais máis relevantes no recoñecemento do talento e compromiso cos valores deportivos.•
Cargando ...
