Sacra Experience reforza a súa aposta pola arte e a cultura na Ribeira Sacra

O proxecto, que inclúe formación, residencias e un festival, contará coa participación de destacados artistas

O Sacra Experience consolídase como unha das iniciativas culturais máis destacadas da Ribeira Sacra, cunha programación que se estenderá ao longo do ano e que inclúe obradoiros, residencias artísticas e un festival multidisciplinar. A aldea de O Pincelo, en Chantada, será o epicentro deste proxecto que busca dinamizar a vida cultural no rural galego a través da formación e a creación artística.
Unha das grandes apostas deste ano é o programa Sacra Forma, que entre abril e xuño acollerá tres obradoiros de danza a cargo de figuras de referencia como Janet Novás, Guillermo Weickert e Laura Morales. A coreógrafa galega centrarase nun taller de creación baseado na observación e a expresión emocional a través do corpo. Pola súa banda, Weickert abordará a superación de canons corporais normativos e Morales explorará as noces de resistencia física e mental na danza contemporánea.
Ademais, Sacra Experience incluirá talleres de cine, fotografía e artes plásticas con nomes recoñecidos como Oliver Laxe, David Jiménez, Pamen Pereira ou Che Marchesi. O proxecto aposta por unha convivencia estreita entre os creadores e a veciñanza, favorecendo a integración da arte no territorio e promovendo un modelo cultural participativo.
O punto culminante do programa será o Sacra Festival, que se celebrará os días 16 e 17 de agosto en espazos singulares da Ribeira Sacra. A programación incluirá espectáculos de danza comunitaria, mostras dos obradoiros artísticos e concertos de artistas como Dulzaro e Niño de Elche, que fusionan música de raíz con novas linguaxes sonoras. A combinación de patrimonio, viño, gastronomía e creación artística consolidan ao Sacra Experience como unha proposta cultural de referencia no rural galego.•