O alcalde de Sober, Luis Fernández Guitián, presentou na Capela de Portabrosmos a programación da XLV Feira do Viño de Amandi, que se celebrará do 11 ao 13 de abril. Acompañado por parte do equipo de goberno, adegueiros e viticultores, o alcalde destacou o carácter da feira, que será novamente un punto de encontro para amantes do viño e a cultura da Ribeira Sacra. Este ano, o Concello do Incio será o invitado de honra.
A feira contará coa participación de 22 adegas locais e, como acto inaugural, a adega A Cividade será a encargada de abrir as portas do evento, nunha lembranza ao seu fundador, José Verao Rodríguez, ao cumprirse dez anos do seu falecemento. Lucía Pérez, a cantante do Incio, será a encargada de ofrecer o pregón o domingo 13 de abril ás 13:00 horas, e tamén ofrecerá un concerto na Praza do Concello o sábado 12.
Durante o evento, celebrarase unha serie de actividades que inclúen actuacións musicais, catas de viños, e unha misa solemne coa bendición de ramos. A programación tamén inclúe a actuación de grupos locais e a tradicional precata de viños, onde un xurado profesional premiará os mellores viños de diferentes categorías. A Feira do Viño de Amandi converteuse nun referente na promoción dos viños de Sober e da Ribeira Sacra.•
Cargando ...
