O delegado territorial da Xunta en Lugo, Javier Arias, mantivo unha reunión coas persoas responsables da asociación deportiva ‘3 Cumios’, recentemente creada con obxectivo de promover o alpinismo. Os tres promotores do proxecto, José Manuel Prieto, Tomás Porto e Manuel Vieitez, son mozos con ampla experiencia neste deporte, cunha traxectoria que inclúe ascensións en lugares como os Picos de Europa, os Alpes, os Pirineos ou a Patagonia.
O seu ‘Proxecto 3 Cumios’, comezará en xullo cunha expedición ao Huascarán, a montaña máis alta do Perú, cunha altitude de 6.768 metros. O proxecto ten como fin escalar os cumios máis emblemáticos de tres continentes ao longo de tres anos. A asociación tamén se propoñen realizar accións divulgativas e doar material deportivo nas zonas nas que desenvolvan as súas expedicións, promovendo a práctica do deporte e a cultura de montaña a nivel internacional.
O delegado territorial destacou o importante labor dos promotores de ‘3 Cumios’ e mostrou o seu apoio a esta iniciativa que une deporte, cultura e valores como a perseveranza e o traballo en equipo.•
Cargando ...
