O Concello de Chantada colabora un ano máis no Proxecto de Democratización do Coñecemento, impulsado pola Universidade de Santiago de Compostela, que ten como obxectivo difundir o coñecemento científico e artístico entre a poboación maior de 50 anos. Durante o mes de xuño, o Telecentro de Chantada acollerá tres actividades formativas que abordarán temas de interese como as especies arbóreas, a alimentación saudable ou a historia de Galicia na época moderna.
A primeira actividade, “Especies arbóreas da nosa terra”, terá lugar os días 11 e 12 de xuño, entre as 16:30 e as 18:00 horas. Nesta xornada, Dona Blanca Fraga Cimadevila, colaboradora do Programa Universitario de Maiores, repasará as especies arbóreas propias da contorna de Chantada. O 13 e 19 de xuño, tamén de 16:30 a 18:00 horas, o investigador Alexandre Lamas Freire abordará o tema “Alimentación e Xenes, un camiño de dobre sentido”, mentres que Salvador Fernández Rico, tamén da USC, falará sobre “Alimentación segura e saudable”. Por último, o 20 e 24 de xuño, os investigadores Tomás Manso Fraga e Mario Sixto Puente ofrecerán a actividade “Campesiños, curas e fidalgos: a vida cotiá na Galicia da época moderna”. O 24 de xuño realizarase tamén unha saída ao Mosteiro de Oseira, onde se aprofundará nesta temática.
Todas as actividades serán impartidas no Telecentro de Chantada, excepto a visita ao Mosteiro de Oseira, e son de acceso gratuíto, pero con prazas limitadas polo aforo do local. Para participar, será necesario inscribirse na Casa da Cultura de Chantada.
Este proxecto ten como principais obxectivos revalorizar o patrimonio, concienciar sobre a ciencia e a súa presenza no día a día, e destacar o valor das disciplinas artísticas nas nosas vivencias. Ademais, busca fomentar o envellecemento activo, mellorar a calidade de vida e promover a participación intelectual das persoas maiores de 50 anos a través destas actividades formativas.•
Cargando ...
