O prazo para presentar as candidaturas estará aberto ata o 16 de abril de 2025
O alcalde de Monforte, José Tomé Roca, deu a coñecer a convocatoria da décima edición do Concurso de Mellores Deportistas e Clubs do 2024, organizado pola Concellería de Deportes. Esta iniciativa busca recoñecer os mellores logros deportivos na vila durante o ano 2024. O pasado 31 de marzo aprobáronse as bases na Xunta de Goberno, establecendo varias categorías para premiar aos mellores atletas e clubs, tanto en categoría absoluta como en promesa, ademais de recoñecer o labor de adestradores, árbitros e entidades deportivas.
Entre as categorías a premiar destacan os mellores deportistas masculinos e femininos absolutos e promesas, mellores adestradores, árbitros, xuíces e equipos, tanto de base como de categoría absoluta. Tamén se outorgará un premio á mellor entidade na promoción do deporte, así como un galardón á deportividade e o xogo limpo. Este ano introdúcese a categoría de “Excelencia Deportiva”, que poderá ser concedida a aqueles/as que teñan un historial destacado de méritos deportivos.
As candidaturas poden ser presentadas polos propios interesados ou por terceiras persoas, sen límite no número de propostas por cada propónte. As solicitudes deben ser entregadas no Rexistro Xeral do Concello de Monforte e, para ser válidas, deben incluir a documentación detallada dos logros conseguidos durante 2024 en cada disciplina.
O prazo de inscrición finalizará o 16 de abril de 2025.
A listaxe definitiva das candidaturas será publicada unha vez remate o prazo, e os gañadores e gañadoras de cada categoría serán anunciados na “Gala do Deporte Monfortino”, que terá lugar en data aínda por determinar. En cada categoría haberá un único vencedor que recibirá un trofeo acreditativo, mentres que os participantes non premiados recibirán un agasallo conmemorativo do concurso.•
Cargando ...
