Sarria celebrou o Día da Poesía

O evento, que serviu de homenaxe ao seu impulsor, Eduardo Rey Moure, congregou na Praza da Vila a máis de 300 persoas

A Praza da Vila foi o epicentro cultural da comarca coa celebración do Día da Poesía, tras o adiamento da cita prevista para o 21 de marzo debido ás malas condicións meteorolóxicas. A actividade contou coa participación dos centros escolares, que interpretaron poemas coa auga como fío condutor. O acto tamén tivo un marcado carácter de homenaxe a Eduardo Rey Moure, mestre e impulsor desta celebración, que agora leva o seu nome. Máis de 300 persoas participaron neste evento, que estivo presentado por Xurxo Souto. O Concello de Sarria expresou o seu agradecemento aos centros educativos e á Escola de Música de Sarria, por contribuír ao éxito desta xornada, que se consolidou como un encontro de reflexión e divulgación da poesía e da identidade local.•