Os traballos na LU-616 e na CG-2.1 encádranse nun plan autonómico de control da vexetación nas marxes das estradas para mellorar a visibilidade e previr lumes
A Consellería de Vivenda e Planificación de Infraestruturas da Xunta de Galicia completou recentemente traballos de limpeza e roza na estrada autonómica LU-616 ao seu paso polo concello lucense do Saviñao. Estas tarefas forman parte dun plan máis amplo de actuacións que tamén inclúe, para a vindeira semana, o inicio dos labores de limpeza na vía de altas prestacións CG-2.1, no tramo que conecta Monforte de Lemos co Alto do Faro, igualmente dentro do termo municipal do Saviñao.
Estes traballos céntranse na retirada da vexetación que medra nas marxes das estradas e na reposición de valados perimetrais, así como na mellora das zonas verdes en sendas peonís e rotondas. O obxectivo é dobre: por unha banda, mellorar a visibilidade para os condutores e garantir a seguridade viaria; por outra, reducir o risco de incendios forestais ao eliminar biomasa acumulada nas proximidades das vías de circulación.
PREVENCIÓN
DE LUMES
O control da vexetación en estradas é unha medida clave para frear a propagación de lumes, especialmente nos meses máis secos. A acumulación de maleza en franxas próximas ás vías pode actuar como combustible en caso de incendio, poñendo en risco tanto aos usuarios das estradas como aos habitantes das zonas limítrofes. Ademais, estas actuacións tamén favorecen a mobilidade segura de peóns e ciclistas, ao manter despexadas as beiravías e sendas.
As intervencións están incluídas no contrato subscrito coa empresa pública Seaga, cun investimento global de 4 millóns de euros para o control da biomasa en toda a rede de estradas autonómicas. Na provincia de Lugo, ademais das actuacións no Saviñao e Monforte, proseguen tamén os traballos na AG-64 entre Vilalba e Xermade.•
Cargando ...
