Interior Galego Vivo (IGV) advertiu que a nova orde da Consellería do Medio Rural, publicada o 9 de abril no DOG, deixa fóra da liña de axudas á colleita en verde á maior parte das pequenas e medianas produtoras da Ribeira Sacra e do Ribeiro. A medida, dotada con 600.000 euros procedentes integramente do fondo europeo Feaga, pretende compensar parcialmente a destrución de uva para vinificación, mais establece uns requisitos que, segundo IGV, exclúen a viticultura tradicional e de autoconsumo.
Entre os criterios esixidos están que as parcelas teñan só variedades tintas, estean en produción e inscritas no Rexistro Vitícola, que foran plantadas antes das últimas tres campañas e que a superficie sexa superior a 500 m². Ademais, debe solicitarse a totalidade da superficie ata un máximo de 10 ha. IGV considera que estas condicións favorecen as grandes explotacións e discriminan ás pequenas produtoras, ao tempo que se ignoran os custos reais de produción e se perpetúa a venda a perdas ao fixar un prezo medio de 1,17 €/kg como base para o cálculo da compensación.
A entidade critica que a Xunta non achegue fondos propios á convocatoria e denuncia que o reparto da axuda —que pode chegar ata os 6.000 euros por hectárea— repite o patrón das anteriores “axudas á paisaxe”, que cualifican de discriminatorias. Tamén consideran que o prazo de presentación de solicitudes, aberto só ata o 25 de abril, é insuficiente e impide que moitas produtoras poidan optar ás axudas. IGV reclama un apoio real á viticultura familiar, clave para evitar o abandono de terras, fixar poboación e preservar a paisaxe de ribeira.•
Cargando ...
