O venres 5 de abril celebrouse na Praza de Abastos de Monforte a inauguración do Mercado para a Medieval, unha actividade que marca o inicio dos actos previos á XXI Feira Medieval, que se desenvolverá os días 19 e 20 de abril. O alcalde, José Tomé Roca, foi o encargado de abrir oficialmente o mercado, acompañado dunha rolda de prensa previa na que presentou o programa de actividades da edición de 2025.
Durante a súa intervención, o rexedor salientou que esta é a 21ª edición ininterrompida da Feira Medieval, consolidándose como un dos eventos máis importantes da cidade. Lamentou, iso si, a falta de resposta por parte da Xunta sobre a solicitude para obter a declaración de Festa de Interese Turístico Galego, aínda que amosou confianza en que o recoñecemento chegue máis pronto que tarde.
O orzamento destinado á organización do evento ascende este ano a 108.351,99 euros, a cifra máis elevada ata o momento, o que supón un incremento do 163% respecto ao ano 2015. Esta aposta económica responde ao crecemento do evento tanto en participación como en asistencia de público.
O Mercado para a Medieval contou durante os días 5 e 6 de abril con 11 postos especializados na venda de traxes medievais feitos a man, complementos, artesanía, bixutería e decoración tanto para negocios como para fogares. A programación incluíu tamén a proxección continuada do vídeo oficial da Feira, así como o vídeo “O bo xantar”, que recolle a oferta gastronómica dos establecementos locais para a ocasión.
Un dos momentos máis esperados foi o desfile de traxes medievais, celebrado o sábado 5 de abril ás 18:30 horas. Por primeira vez, o desfile desenvolveuse ao aire libre, partindo desde a entrada do mercado ata a zona gastronómica, respondendo á elevada afluencia de público das edicións anteriores. Participaron 23 modelos, entre adultos e nenos, que presentaron un total de 92 traxes de época nun percorrido de aproximadamente unha hora de duración.
O concurso de repostería e pastelaría “A polo mellor doce” tamén tivo lugar durante o mercado. Os visitantes puideron degustar e votar as elaboracións nas categorías de doce tradicional, innovador e creativo. A entrega de premios celebrouse o domingo 6 ás 13:00 h, seguida dun sorteo entre os participantes no proceso de votación.
ACTIVIDADE PROMOCIONAL
Ademais, ao longo da fin de semana, proxectouse no recinto o novo vídeo promocional da Feira Medieval, que inclúe imaxes dos principais momentos da edición anterior, acompañadas dunha banda sonora de ton épico. Esta peza audiovisual difundirase tamén a través das redes sociais e a web municipal, e estará visible nos mupis do Cardenal e nas pantallas situadas en San Vicente e na Praza de España durante a celebración da Feira.
Na súa comparecencia ante os medios, José Tomé destacou a importancia do traballo de promoción realizado polo Concello, que inclúe insercións publicitarias en prensa e radio a nivel local, provincial e autonómico, así como o reparto de carteis pola cidade, comarca e principais núcleos urbanos galegos. Tamén se instalarán materiais promocionais durante a Feira do Viño de Sober, evento que congrega a numerosos visitantes.
O cartel oficial da edición 2025 baséase nunha imaxe real da pasada Feira Medieval, incorporando elementos representativos como a música e a estética medieval. “Queremos transmitir forza, sorpresa e autenticidade”, sinalou o alcalde, quen afirmou que “a Feira de Monforte ten entidade suficiente para promocionarse por si mesma”.•
Cargando ...
