A Xunta abre ata setembro o prazo para solicitar as axudas a iniciativas empresariais de base tecnolóxica

O programa IEBT destina medio millón de euros para apoiar ata 21 proxectos durante o seu primeiro ano de actividade

Os apoios poderán ser de ata 24.000 € para a creación directa de emprego estable ou de ata 30.000 para o inicio e posta en marcha da actividade, tendo en conta que cando a IEBT sexa cooperativa ou sociedade laboral, a axuda subirá nun 25%. Foto ENVATO.

As persoas interesadas en poñer en marcha unha empresa de base tecnolóxica en Galicia xa poden solicitar, desde este martes 22 de abril e ata o 30 de setembro, as axudas autonómicas do programa IEBT. Así o recolle a convocatoria publicada esta semana no Diario Oficial de Galicia, que conta cun orzamento de 500.000 euros co obxectivo de apoiar ata 21 iniciativas durante o seu primeiro ano de funcionamento.
A convocatoria contempla catro liñas principais de apoio económico: creación directa de emprego estable, inicio da actividade, apoio á función xerencial e conciliación da vida persoal, laboral e familiar. As achegas poderán acadar os 24.000 euros por posto de traballo indefinido creado, chegando ata os 30.000 euros para cubrir os custos iniciais da actividade. A función xerencial poderá contar con ata 12.500 euros, mentres que a liña de conciliación permitirá sufragar ata 3.000 euros.
Estas contías increméntanse nun 25% cando se trate de cooperativas ou sociedades laborais. Ademais, a axuda base por cada persoa desempregada incorporada, fixada en 6.000 euros, poderá chegar ata os 8.000 se o traballador é menor de 30 anos, maior de 52, muller, emigrante retornado ou estranxeiro. Tamén se contempla un incremento adicional acumulable do 25% se o proxecto se desenvolve nun concello rural, entre outras condicións.
Entre os gastos subvencionables inclúense os servizos notariais e de rexistro, compra de materias primas, alugueiro de locais, equipamentos, seguros, publicidade ou creación de páxinas web. As axudas á función xerencial cobren a formación empresarial e a contratación externa de estudos ou análises. Pola súa banda, as achegas para conciliación poderán cubrir ata o 75% do custo dos servizos de coidado contratados.
O programa IEBT, en funcionamento desde 2001, busca fomentar o emprendemento entre investigadores e titulados universitarios, promovendo a creación de empresas innovadoras e o emprego cualificado.•