O grupo municipal do BNG en Monforte presentou no último Pleno unha moción para a creación dun Consello Municipal de Educación, co obxectivo de favorecer a participación da comunidade educativa na toma de decisións e mellorar a coordinación entre centros educativos, ANPAs, alumnado, profesorado e o propio Concello. A proposta inclúe a creación dun espazo de diálogo onde todos os axentes implicados na educación poidan compartir propostas e identificar necesidades reais no ámbito educativo local.
“O noso obxectivo é que a educación sexa unha prioridade local, cun espazo estable de colaboración que permita mellorar a calidade do ensino en Monforte”, sinalou o concelleiro do BNG, Manuel Luaces, ao presentar a moción. O partido tamén propón a elaboración dun regulamento participativo e a dotación dos medios necesarios para garantir un funcionamento efectivo do Consello Municipal de Educación.
Ademais desta proposta, o BNG tamén inclúe na moción unha petición á Xunta de Galicia para a creación dunha praza específica de médico/a para o servizo de Hospitalización a Domicilio (HADO) no Hospital de Monforte, tal e como establece o Decreto 34/2021. A día de hoxe, o servizo é cuberto polo persoal de Medicina Interna, o que, segundo o BNG, supón unha sobrecarga e unha menor calidade asistencial. O partido denuncia a discriminación sanitaria na comarca e exixe que se cumpra a normativa vixente.
O BNG espera que a moción sexa apoiada pola maioría do Pleno e que as propostas presentadas melloren tanto o sistema educativo como a atención sanitaria na comarca.•
Cargando ...
