O director da Axencia Galega da Calidade Alimentaria, Martín Alemparte, fixo entrega recentemente de 3.900 enxertos de vide de categoría base aos viveiros galegos. O acto tivo lugar no Centro de Formación e Experimentación Agraria de Monforte de Lemos, onde se concentra unha parte esencial da actividade de conservación e multiplicación do material vexetal seleccionado. Esta entrega forma parte da oferta total da Xunta para este ano, que ascende a 28.400 exemplares, dos cales unha parte poderá ser distribuída a viveiros doutras comunidades se se cobren previamente as necesidades da produción galega.
O material entregado procede do programa de selección clonal da Estación de Viticultura e Enoloxía de Galicia (Evega), que busca garantir a identidade varietal e a sanidade dos exemplares. Trátase dunha ferramenta clave para mellorar o rendemento dos viñedos e favorecer a produción de viños con maior tipicidade e calidade. As variedades incluídas abranguen tanto castes brancas como tintas, con 36 clons certificados: 23 de variedades brancas como Albariño, Godello ou Treixadura, e 13 de tintas como Mencía, Caíño Tinto ou Brancellao.
Desde os anos 80, a Evega mantén programas de mellora xenética que permiten ofrecer material certificado para a creación de campos de pés nais. A reprodución realízase con trazabilidade garantida e segundo o Regulamento Técnico de Control e Certificación da Vide. A entrega de 2025 supón o segundo ano da nova fase do plan, que ampliou a oferta inicial para reforzar a sustentabilidade e rendibilidade do sector vitivinícola galego.•
Cargando ...
