Sober celebra a XLV Feira do Viño de Amandi cunha masiva afluencia de público e a participación

O Concello de Sober viviu hoxe a xornada principal da XLV Feira do Viño de Amandi, cunha gran asistencia de veciños e visitantes que se reuniron para celebrar o viño de Amandi e a súa cultura. O acto foi presidido polo alcalde Luis Fernández Guitián, que destacou a importancia desta festividade para a valorización dos viños da subzona Ribeira Sacra. Este evento é un referente anual para o municipio e un escaparate para os viños de Amandi, unha das denominacións máis recoñecidas da Ribeira Sacra.
O pregón desta edición correu a cargo da cantante Lucía Pérez, natural do Incio, municipio homenaxeado este ano na Feira. A artista, moi querida polo público de Sober, puxo en valor a vinculación entre as terras de Amandi e a tradición vitivinícola, facendo alusión á Terra Brava de Ánxel Fole para referirse á forza e autenticidade da rexión. Pérez, que chegou a Sober rodeada de afecto, destacou a súa relación persoal co viño e a súa importancia para a súa familia e comunidade, facendo un chamamento á conservación e á promoción dos produtos autóctonos galegos.
Os viños gañadores desta edición foron os seguintes: en tinto xoven, Cividade Mencía (Adega Cividade), Coronin’24 (A Carqueixa) e Romeo Domain’24 (Adega Gullufre); en branco xoven, Don Nilo’24 (Adega Tear); en rosado xoven, Cardenal Rodrigo Castro 24 (Adega Soutelo); en tinto barrica, Prómine Barrica’23 (Adega A Petrón); e en viño doutras colleitas, Dona Regina Godello Garda 23 (Regina Viarum). A elección dos mellores viños desta edición estivo marcada pola calidade e a innovación. O alcalde de Sober tamén destacou o traballo das mulleres e homes que, co seu esforzo diario, contribúen á continuidade dunha nova colleita e á preservación das tradicións vitivinícolas. En relación coa candidatura «A Paisaxe da Auga da Ribeira Sacra» como Patrimonio da Humanidade, Fernández Guitián afirmou que a implicación colectiva será clave para lograr este obxectivo en poucos meses, sinalando a importancia da cooperación entre os veciños, as administracións e as adegas.•