O Centro Botín de Santander vén de abrir ao público o pasado 12 de abril a exposición Maruja Mallo: Máscara y compás. Pinturas y dibujos de 1924 a 1982, a exposición máis completa realizada ata o de agora sobre a artista galega, con máis de noventa obras procedentes de coleccións nacionais e internacionais. A mostra, comisariada por Patricia Molins e coproducida co Museo Reina Sofía, ofrece un percorrido pola evolución creativa dunha das figuras máis singulares da Xeración do 27. Mallo, nacida en Viveiro en 1902 e con raíces familiares no concello de Sober, desenvolveu unha obra profundamente orixinal que transitou entre o realismo máxico, a vangarda e a experimentación xeométrica. A exposición poderá visitarse ata o 14 de setembro na segunda planta do centro cántabro. Xunto ás obras, incluiranse documentos e fotografías que permiten coñecer o seu contexto teórico e vital, entre eles materiais do Arquivo Lafuente que axudan a entender a relevancia contemporánea do seu legado artístico.
Cargando ...
