A XXX Mostra de Viños da Ribeira Sacra de Pantón celebrouse a pasada fin de semana no Campo da Feira do concello, cun balance positivo tanto en participación como en visibilidade para os viños da zona. O evento congregou nove adegas da Denominación de Orixe Ribeira Sacra: Alma das Donas, Casa Moreiras, Finca Míllara, Ciudaseis, Nogueiras, Capilla, Saíñas, Don Ventura e Corzoás. A feira contou co respaldo da Xunta de Galicia e da Deputación de Lugo. A inauguración oficial tivo lugar o venres, coa presenza da conselleira do Medio Rural, María José Gómez, quen puxo en valor a calidade dos viños galegos e destacou o peso económico do sector vitivinícola, especialmente na Ribeira Sacra. Gómez lembrou que a denominación conta con máis de 1.300 hectáreas inscritas, case 2.170 viticultores e un cento de adegas, cun valor de mercado que supera os 21 millóns de euros. Tamén subliñou o apoio do Goberno galego mediante programas como a reestruturación da viña ou a promoción en terceiros países.
A clausura da feira celebrouse o domingo, coa asistencia da deputada provincial Pilar García Porto, quen salientou a importancia da viticultura como motor económico e turístico sostible. O pregón correu a cargo do xornalista Marcial Mouzo, que fixo un percorrido emotivo pola historia da mostra desde os seus inicios no ano 1994. Mouzo reivindicou o papel dos viticultores e animou a seguir valorizando os viños de Pantón, cunha mención especial ao seu recoñecemento nacional e internacional.
Nesta edición, o Concello apostou por reforzar Pantón como destino turístico integral. A programación incluíu catas comentadas, concertos, experiencias sensoriais e a tradicional festa da empanada. Tamén houbo un servizo de autobuses desde Monforte e Escairón, co obxectivo de favorecer o consumo responsable de viño.•
Cargando ...
