As axudas, abertas ata o 30 de setembro, permiten acceder a financiamento de ata un millón de euros para investimentos, circulante ou reestruturación de débedas
A conselleira de Economía e Industria, María Jesús Lorenzana, anunciou este xoves que a liña de préstamos do Instituto Galego de Promoción Económica (Igape) destinada a facilitar o acceso ao crédito das pequenas e medianas empresas contará este ano cun orzamento de 19 millóns de euros. A convocatoria permanece aberta ata o 30 de setembro e ofrece préstamos avalados por entre 3.000 e 1 millón de euros, dirixidos a investimentos produtivos, capital circulante ou ao pagamento e reestruturación de débedas.
A titular da consellería fixo este anuncio durante a súa visita ás instalacións do ximnasio Growgym, un dos negocios beneficiarios deste programa de apoio financeiro. Lorenzana salientou que a principal novidade deste ano é o incremento da dotación orzamentaria, que pasa dos 17,5 millóns da convocatoria anterior aos actuais 19 millóns, co obxectivo de mobilizar operacións de financiamento por un valor superior aos 150 millóns de euros.
Segundo explicou, ata o momento presentáronse 874 solicitudes, que suman un importe solicitado de 146,7 millóns de euros. Estes datos, segundo a conselleira, amosan a boa acollida que a liña segue tendo entre as empresas galegas. A conselleira tamén fixo balance do impacto do programa desde 2020 ata 2024: neste período, o Igape destinou 30,6 millóns de euros a esta liña de apoio, que permitiu mobilizar 389 millóns de financiamento e chegar a 4.926 pemes e autónomos.
O sector máis beneficiado foi o comercio, seguido da industria, a hostalería e o turismo.
Por provincias, A Coruña concentrou o maior número de solicitudes (46,78 %), seguida de Pontevedra (34,9 %), Lugo (10,26 %) e Ourense (7,99 %). Lorenzana destacou que se trata dunha liña de financiamento especialmente competitiva, tendo en conta o contexto de tipos de xuro elevados dos últimos meses.•
Cargando ...
