Por Gonzalo L. Torres
O Club Lemos, estes últimos anos está a afacer á súa afección para sufrir, pero o desta tempada xa roza o dramático. Foi un ano complexo, cun cambio de directiva no medio da tempada, que terminou con Antonio López na presidencia, á fronte dun pequeno grupo de colaboradores e directivos entre os que destacan as figuras de Rodri na directiva, e o regreso de Óscar Moure, agora como Director Deportivo. Unha das súas primeiras decisións foi o cesamento de Juanlu Bernal, e a súa substitución por Edu Rodríguez, que volvía ao club monfortino , tras o seu exitoso paso pola SD Sarriana hai uns poucos anos. Chegou nun momento da tempada na que os lemistas parecía que fixeran xa os seus deberes, e que a salvación estaba practicamente conseguida e algún afeccionado mesmo se permitía soñar con pelexar polas prazas de promoción de ascenso. Pero todo converteuse rapidamente nun espellismo. O terzo final da tempada foi una auténtico calvario para o Club Lemos, encadeando desde a xornada 22 unha serie negativa de nove partidos sen obter unha vitoria, o que puxo aos brancos ao límite, obrigados a gañar imperativamente nas dúas últimas xornadas se non querían perder a categoría. Primeiro tiveron que facelo en Escairón, por un axustado 0-1, e quedaba rematar a faena en casa ante o Mugardos, nunha auténtica final. O partido foi moi difícil, pero finalmente os de Edu levaron a vitoria por 2-1, e unha explosión de xúbilo e alivio invadiu A Pinguela. Toca rematar a tempada coa Copa Deputación, pero sobre todo, planificar correctamente o próximo ano, para contar cun grupo de xogadores máis amplo e competitivo, que permita, xa non pelexar polo soñado ascenso a Terceira, pero polo menos, salvar máis desahogadamente a categoría. Non será fácil, pero hai algúns modelos para seguir non moi lonxe de Monforte, non fai falta máis que ver o que está a conseguir a SD Sarriana, que pelexará por ascender a segunda federación un ano máis. Tamén debemos lembrar o descenso do At. Escairón, que este ano non conseguiu conformar un equipo que lle permitise competir de maneira continuada por manter a categoría, e leva xa moitas xornadas descendido.•
Cargando ...
