O Concello de Monforte presenta a nova edición do seu “Programa Deportivo de Verán”, que se desenvolve entre os meses de xullo e agosto e que contará con tres actividades principais: o Campamento Deportivo de Verán, o XIX Campus de Fútbol Cidade de Monforte en colaboración co Real Club Celta de Vigo e os cursos de tenis. O prazo de inscrición estará aberto ata o 21 de maio.
O Alcalde de Monforte, José Tomé, destacou que esta nova edición do programa busca responder á necesidade de conciliación familiar que xera o período estival. «Decidimos organizar esta nova edición motivados pola necesidade de ofrecer aos nosos nenos e nenas unha actividade divertida e saudable, ademais de facilitar a conciliación para moitas familias», afirmou Tomé. O programa inclúe opcións para diferentes idades e intereses, co fin de fomentar a práctica deportiva entre a mocidade local.
Requisitos de inscrición
As persoas interesadas en participar no Programa Deportivo de Verán deberán estar empadroadas en Monforte. No caso de que o neno non estea empadroado no concello, poderá participar se algún dos seus proxenitores ou avós está empadroado.
Campamento Deportivo de Verán
O Campamento Deportivo de Verán será unha das actividades máis demandadas, e este ano amplíase en 30% respecto a edicións anteriores. Desenvolverase en tres quendas: do 1 ao 15 de xullo, do 16 ao 31 de xullo e do 1 ao 14 de agosto. O horario será de 10:00 a 14:00 horas, de luns a venres, e o número de prazas ofertadas será de 360, repartidas en 12 grupos de 10 nenos por monitor. No total, as actividades ofrecerán 32 días de deporte e lecer, 12 máis que o ano anterior.
Tomé indicou que o Concello seguirá co seu esforzo por mellorar a oferta, asegurando que «o programa, que se desenvolve no complexo deportivo da Pinguela, combinará actividades multideportivas e obradoiros, así como excursións». O custo por quincena será de 51,75 euros sen transporte, e de 67,28 euros se se require o servizo de transporte. As familias numerosas poderán beneficiarse dun 50% de desconto.
Campus de Fútbol do Celta
Outra das actividades destacadas do programa é o XIX Campus de Fútbol Cidade de Monforte, que se celebrará entre o 28 de xullo e o 1 de agosto no Campo Municipal de Fútbol Luis Bodegas. Este campus, que xa conta con 19 edicións, está dirixido a nenos e nenas de entre 7 e 14 anos. O custo será de 26,91 euros, cun 50% de desconto para familias numerosas. O número de prazas ofertadas será de 100, distribuídas en 6 grupos.
Cursos de Tenis
Os cursos de tenis, que se celebrarán nas Pistas Municipais da Pinguela, serán impartidas en tres quendas: do 1 ao 15 de xullo, do 16 ao 31 de xullo e do 1 ao 14 de agosto, os martes e xoves de 10:00 a 11:00 horas. O número total de prazas será de 54, cun máximo de 6 participantes por grupo. O custo será de 20,70 euros, con desconto do 50% para familias numerosas.
Matrícula e prazos
Os prazos de matrícula son os mesmos para todas as actividades: as persoas preinscritas deberán confirmar a súa praza entre o 9 e o 20 de xuño, presentando a documentación requirida ben a través de mail ou nas Oficinas Municipais de Deportes e Xuventude. O 26 de maio será publicada a lista de preinscritos. Se as prazas son insuficientes, realizarase un sorteo o 4 de xuño.•
Cargando ...
