O Consorcio de Turismo da Ribeira Sacra presentou a pasada semana en Monforte de Lemos o proxecto “Competitividade 4.0: Ribeira Sacra”, unha iniciativa que se enmarca no Plan de Sostibilidade Turística e que ten como obxectivo mellorar a formación das empresas do sector a través de accións adaptadas ás súas necesidades reais.
UN ESTUDO PARTICIPATIVO
A xornada reuniu en Monforte a representantes de empresas e servizos turísticos da comarca, que puideron coñecer de primeira man os detalles do proxecto. Segundo explicaron os responsables da proposta, trátase dunha actuación deseñada a partir dun estudo participativo que recolle as achegas do propio tecido empresarial, co fin de ofrecer unha formación útil, con seguimento individualizado e titorización personalizada.
CAMBIO XERACIONAL, DIXITALIZACIÓN E PROFESIONALIZACIÓN
Desde a organización destacouse que o proxecto “non vai de facer formación por facela”, senón de poñer en marcha recursos axeitados logo de escoitar aos profesionais. A iniciativa pretende dar resposta a retos como a substitución xeracional, a dixitalización, a profesionalización do sector ou a aposta por un modelo turístico máis sostible e respectuoso coa contorna.
Durante o encontro tamén se avanzou unha proposta de pequenas charlas en liña complementarias e anunciouse que a principios de xuño se abrirá o prazo de inscrición para as primeiras accións formativas gratuítas.
INVITACIÓN A PARTICIPAR
As empresas que aínda non participasen poden sumarse cubrindo un cuestionario en liña dispoñible na web do Consorcio de Turismo da Ribeira Sacra.•
Cargando ...
