Coincidindo coa fin de semana das Letras Galegas, que este ano recoñece o papel das cantareiras na transmisión da poesía oral, a Vicepresidencia da Deputación de Lugo lanza a serie de podcast “Folcast”, un percorrido pola oralidade e a música tradicional de Lugo, que terá a Concha de Agrade como a protagonista do primeiro episodio. A súa voz forma parte do Cancioneiro Popular Galego de Dorothé Schubarth, obra de referencia da etnomusicoloxía galega.
A presentación terá lugar o sábado 18 de maio, ás 13:00 horas na casa natal de Concha, en San Vicente de Agrade. Antes, ás 12:00, a Coral de Chantada participará na misa na igrexa parroquial. No acto intervirán familiares e especialistas, ademais das pandeireteiras de Dakidoasma, que ofrecerán varias pezas musicais. A xornada pecharase cun petisco colaborativo aberto a toda a veciñanza.•
Cargando ...
