O 5º Congreso Provincial, que reuniu máis de 150 delegados no Hotel Torre de Núñez, serviu para renovar a dirección do partido, aprobar unha nova estratexia política e reivindicar o PSdeG como alternativa sólida ao modelo do PP
José Tomé Roca foi proclamado este sábado secretario xeral do PSdeG-PSOE na provincia de Lugo durante o 5º Congreso Provincial, celebrado no Hotel Torre de Núñez baixo o lema “Lugo: construíndo futuro”. Máis de 150 delegados e delegadas de toda a provincia participaron na renovación dos órganos de dirección. T A nova Executiva está formada por 35 persoas —17 mulleres e 18 homes— e inclúe 22 novas incorporacións. O monfortino subliñou a importancia do traballo territorial e das agrupacións locais, e sinalou as municipais de 2027 como o seguinte reto. Identificou ao PP como principal adversario político e defendeu un modelo centrado na igualdade, os servizos públicos e o desenvolvemento sostible. Tamén reclamou un plan industrial para A Mariña e destacou o potencial do turismo, o agro e o patrimonio. Durante a súa intervención de clausura, Tomé Roca agradeceu “de corazón” a confianza renovada pola militancia e sinalou que asume esta responsabilidade “cun compromiso absoluto coa provincia de Lugo e coas persoas que viven”. Subliñou que o congreso foi un exemplo de vitalidade democrática: “un exercicio de participación interna que nos fortalece como organización política e nos reafirma como un partido vivo, plural e comprometido”. O Secretario Xeral identificou con claridade ao Partido Popular como o principal adversario político: “O PP representa un modelo esgotado, ancorado no pasado, baseado no bloqueo institucional, na conservación do poder a calquera prezo e na utilización partidista dos recursos públicos”. Fronte a iso, José Tomé Roca defendeu un modelo socialista que pon no centro as persoas: “Protexer os servizos públicos, garantir a igualdade, impulsar o desenvolvemento sostible e construír unha sociedade xusta son os piares da nosa proposta”.
Na súa intervención, o Secretario Xeral comprometeuse a facer do PSdeG un partido accesible á mocidade: “Debemos comprender e incorporar a súa maneira de comunicarse e participar, abríndolles as portas para que sexan protagonistas activos do noso proxecto”. •
Cargando ...
