O Concello de Monforte vén de iniciar os traballos para redactar o IV Plan de Igualdade de Oportunidades entre Mulleres e Homes, un documento que servirá de guía para as políticas locais nesta materia nos vindeiros anos. A elaboración deste novo plan responde á avaliación do anterior, na que se constataron avances, pero tamén a necesidade de continuar promovendo accións que garantan a igualdade efectiva.
O obxectivo principal desta nova fase é fomentar un proceso de reflexión e participación cidadá que permita adaptar as políticas públicas á realidade social de Monforte. O plan será desenvolvido por un equipo mixto composto por persoal do Centro de Información á Muller e da consultora especializada en igualdade SECES CIT, S.L.
A primeira etapa consiste na realización dunha diagnose municipal cun enfoque de xénero. Para iso, solicitouse a colaboración da veciñanza mediante unha enquisa dispoñible na web do Concello. A participación cidadá nesta fase considérase fundamental para axustar o futuro plan ás necesidades reais do territorio. Dende o goberno local anímase á poboación a cubrir a enquisa e contribuír á construción dun Monforte máis igualitario.•
Cargando ...
