O campo de voluntariado de Quiroga porá en valor a fervenza do Pozo do Batán

Quiroga contará este verán cun novo campo de traballo organizado pola Consellería de Cultura, Lingua e Xuventude, tras a solicitude formulada pola área de Xuventude do Concello. A acción principala desenvolver polos participantes centrarase na posta en valor da fervenza do Pozo do Batán, situada no río Ferreiriño, nas proximidades do pregamento xeolóxico de Campodola-Leixazós e da ruta PRG-192.
Durante as dúas semanas de duración, do 23 de xullo ao 8 de agosto, os participantes realizarán labores de roza, limpeza e sinalización dos accesos á fervenza. Ademais, implicaranse na elaboración dun vídeo promocional sobre o Pozo do Batán e colaborarán na divulgación do Xeoparque Montañas do Courel e na dinamización das rutas do municipio.
O programa inclúe tamén actividades de lecer, como unha ruta guiada ata a mina romana de Montefurado e visitas ao pregamento xeolóxico e aos museos de Quiroga.
O campo de traballo contará con 15 prazas para mozos e mozas de entre 18 e 30 anos, de procedencia internacional.
As persoas interesadas poden inscribirse nos correos electrónicos seguintes:

• camposdevoluntariado.xuventude@xunta.gal.
• camposlugo@xuventude.xunta.gal.•