A Real Academia Galega celebra este sábado 17 de maio, Día das Letras Galegas, unha sesión extraordinaria e pública no Centro Cívico e Cultural de Malpica de Bergantiños, vila natal das Pandeireteiras de Mens, protagonistas da edición deste ano xunto ás cantareiras Adolfina e Rosa Casás (Cerceda) e Eva Castiñeira (Muxía). O acto comezará ás 12:30 horas e contará coas intervencións da académica Ana Boullón, impulsora da candidatura; do filólogo Antón Santamarina, coautor do Cancioneiro Popular Galego; e do expresidente da RAG Xesús Alonso Montero. A parte musical estará a cargo das Tanxugueiras. A entrada será libre ata completar aforo e poderá seguirse tamén en directo en academia.gal. A homenaxe recoñece o papel esencial das mulleres do pobo na creación e transmisión da poesía popular oral e salienta a continuidade desta tradición en voces actuais como as de Aida Tarrío e Olaia e Sabela Maneiro. Trátase do segundo acto oficial das Letras deste ano, tras a presentación en marzo en Cerceda da nova edición de Primavera das Letras, proxecto infantil que inclúe a obra As Ferreñas, escrita por Paula Carballeira e ilustrada por Nuria Díaz. A terceira cita será no outono en Muxía, con xornadas arredor das cantareiras. Ademais das actividades presenciais, a RAG ofrece contidos dixitais, como a serie documental Se canto é porque quero e vídeos sobre toponimia vencellada ás homenaxeadas. O servizo de publicacións distribuirá o volume Por que non hei de cantar?, coordinado por Manuel Rico Verea, cun repaso ás recolleitas e cancioneiros populares, con especial atención á figura da etnomusicóloga Dorothé Schubarth.
Cargando ...
