O alcalde de Quiroga, José Luis Rivera, asinou un convenio de colaboración coa empresa de enxeñaría cántabra Star Project Consulting (SPC) para avanzar no proxecto da ponte colgante de Campodola. SPC será a encargada de elaborar o proxecto básico da infraestrutura e de iniciar a avaliación ambiental, traballando en coordinación coas diferentes administracións para integrar todos os requisitos técnicos e normativos necesarios.
A previsión inicial é que a documentación estea lista nun prazo de tres ou catro meses.
A sinatura do convenio tivo lugar nunha reunión de traballo na que participaron tamén alcaldes e representantes do Xeoparque Montañas do Courel e do Consorcio de Turismo da Ribeira Sacra. No encontro abordáronse tamén propostas para a divulgación do pregamento xeolóxico de Campodola-Leixazós, declarado Monumento Natural.
A ponte colgante, de uso peonil, está concibida como unha infraestrutura singular dentro do Xeoparque e da ruta do Camiño de Inverno. Permitirá observar o pregamento desde unha perspectiva privilexiada e aspira a converterse nun atractivo turístico e dinamizador do territorio.•
Cargando ...
