A SD Sarriana escribiu unha páxina inesquecible na súa historia ao clasificarse por primeira vez para a final da fase de ascenso a Segunda Federación. Fíxoo tras unha eliminatoria de infarto ante o Racing Vilalbés, na que, malia caer por 0-1 na volta en Ribela, fixo valer a súa vitoria en Vilalba e a súa mellor posición na liga regular para avanzar de rolda.
O encontro foi intenso e moi igualado. O gol de Cañizares no minuto 39 puxo contra as cordas aos locais, que souberon resistir o empuxe chairego, especialmente nunha prórroga chea de emoción. A Sarriana tivo ocasións claras para sentenciar, como un dobre remate de Arona e Azael que rozou o gol. A entrega do equipo e o apoio da afección foron claves para manter viva a ilusión do ascenso.
Agora, o conxunto de José Antonio Rodríguez terá diante ao CD Estradense, que superou ao Noia por 2-0 na outra semifinal. O equipo da Estrada é un vello coñecido da categoría, cun bloque sólido, experiencia en partidos decisivos e xogadores desequilibrantes. Un rival especialmente perigoso na súa casa, polo moito que apreta a nutrida afección da Estrada. A ida disputarase este domingo 1 de xuño en Ribela, mentres que a volta será o sábado 8 no Novo Campo da Estrada.
A Sarriana afronta esta final co reto de culminar unha tempada histórica. O soño do ascenso está a só dous partidos. A afección xa respondeu e Ribela prepárase para vivir outra tarde máxica. Vese con envida sana dende Monforte, e moitos serán os lemistas que se acerquen a Sarria esta fin de semana para disfrutar de perto da paixón do fútbol, algo que hay xa moito tempo do que non se disfruta na Pinguela. Os tempos trocan, agora a referencia do fútbol no sur de Lugo está en Sarria, oxalá logren o ascenso.•
Cargando ...
