Máis de 8.000 maiores da comarca de Lemos xa poden beneficiarse do Carné +65

A iniciativa da Xunta de Galicia ofrece descontos de ata o 30 % en servizos culturais, sanitarios e de ocio, con 13 establecementos adheridos na comarca

O Carné +65 permite que máis de 81.000 persoas maiores da provincia de Lugo —máis de 8.000 na comarca de Lemos— accedan a descontos e vantaxes en servizos culturais, sanitarios, turísticos e de ocio. A iniciativa, totalmente gratuíta, está dirixida a todos os maiores de 65 anos ou máis empadroadas en Galicia, que están a recibir o carné nos seus domicilios ou poden solicitalo por correo electrónico. Actualmente, preto de 800 establecementos galegos están adheridos ao programa, máis de cen de Lugo e 13 da comarca de Lemos. Estes locais ofrecen descontos de ata un 30 % e están identificados cun distintivo que facilita a súa localización polos usuarios. A previsión é que a cifra se achegue ao milleiro antes de rematar o ano. Os deputados Raquel Arias e José Manuel Mato visitaron o Hotel-Balneario Augas Santas de Pantón, onde se reuniron co director, Santiago Villanueva, e animaron á poboación maior a facer uso do carné. A información completa, os establecementos participantes e os descontos dispoñibles pode consultarse na web da Consellería de Política Social. Os maiores poden gozar de actividades culturais, visitas a museos e concertos, así como servizos sanitarios, incluíndo consultas médicas e tratamentos terapéuticos. Tamén facilita o acceso a instalacións deportivas e balnearios, promovendo un estilo de vida saudable entre a poboación maior.•