O alcalde José Tomé reuniuse co CEO do Grupo Indukern para avaliar a evolución da futura planta no polígono do Reboredo
O alcalde de Monforte de Lemos, José Tomé Roca, acompañado pola tenente de alcalde, Gloria Prada Rodríguez, mantivo unha reunión de traballo na Alcaldía co vicepresidente e CEO do Grupo Indukern, Raúl Díaz-Varela Bertschinger, para analizar o estado actual do proxecto industrial que a empresa farmacéutica Kern Pharma ten previsto implantar no polígono industrial do Reboredo.
Durante o encontro, ambas partes constataron os avances rexistrados nos últimos meses na planificación da planta, que se viu afectada por diversos factores externos, como a pandemia da COVID-19 e o notable incremento dos custos de construción. Estas circunstancias provocaron un atraso no calendario inicial, mais a empresa mantén o seu compromiso coa iniciativa e xa dispón da parcela adquirida no polígono para desenvolver as instalacións.
A xuntanza desenvolveuse nun ambiente de colaboración e entendemento, no que se avaliaron tamén as liñas de produción que Kern Pharma pretende implantar en Monforte. A previsión é que entre os meses de setembro e outubro se poidan dar pasos definitivos para o inicio das obras, que suporán un importante impulso económico e laboral para a comarca.
O proxecto, anunciado hai tres anos, contempla a creación dunha planta de produción farmacéutica centrada en medicamentos de uso hospitalario e produtos de alto valor engadido. A instalación prevé xerar emprego cualificado e consolidar a presenza da marca Kern Pharma en Galicia, converténdose nun referente do sector no noroeste peninsular.
Desde o Concello destacan a importancia estratéxica desta iniciativa, tanto pola súa capacidade de atracción de investimento como polo seu impacto na dinamización do tecido industrial local. O alcalde expresou a súa satisfacción polo compromiso mantido pola empresa e pola boa evolución do proxecto, que cualificou como “clave para o futuro económico de Monforte”.•
Cargando ...
